जागतिक आरोग्य संघटनांनी केलेल्या व्याख्याप्रमाणे आपल्या शरीरात काही रोग नसणे म्हणजे निरोगी असणे असे नव्हे. तर जेव्हा आपण शारिरीक, मानसिक, सामाजिक व आध्यात्मिक पातळीवर स्वस्थ असू तेव्हाच आपण आरोग्यसंपन्न आहोत असे म्हणता येईल. सध्याची आपली जीवन पध्दती आणि औषध उपचार पध्दती केवळ शारिरीक पातळीवर कार्य करतांना दिसते.

संशोधक असे सांगतात की ८० % पेक्षा जास्त आजार हे मनोकायिक असतात. म्हणजेच कमजोर व अशक्त मनामुळे निर्माण झालेले असतात. वेगवेगळया प्रकारचे ताण तणाव, राग, चिडचिडपणा, एकटेपणा, नैराश्य, जल्दबाजी, प्रेमाचा अभाव, सतत तक्रार करण्याचा स्वभाव, प्रत्येक घटनेकडे नकारात्मक दृष्टीकोनाने पाहण्याची सवय या सर्व नकारात्मक विचार, भावभावना व मानसिक कमजोरीमुळे अनेक आजार होतात. त्यात हृदयविकार अग्रेसर आहे. हृदयविकार होण्याचे ८० % कारण मानसिक प्रदुषण आहे व २० % चुकीची आहार पध्दती व व्यायामाचा अभाव हे आहे. त्यात अनियमित झोप, मधुमेह, उच्च रक्तदाब, मोटापा, धुम्रपान, व्यसन, रक्तात वाढलेली कोलेस्टरॉलची पातळी, अनुवांशिकता हे घटक हृदयरोग बळावण्यासाठी कारणीभूत ठरतात यांनाच Risk Factor म्हणतात.

सावधान ! भारतात हृदयविकाराचे रूग्ण वाढत आहेत

२०१५ च्या अहवालाप्रमाणे सुमारे ६२ मिलीयन व्यक्ती भारतात हृदयविकाराचे शिकार झाले आहेत. त्यामधील ३७ मिलीयन व्यक्तींचे वय ५० वर्षापेक्षा कमी आहे. त्यातील २.९ मिलीयन व्यक्ती हृदयरोगामुळे दरवर्षी मृत्यु पावतात. गेल्या काही दशकात जवळपास ३०० % पेक्षा जास्त ह्दयरोगाचे रूग्ण भारतात वाढले आहेत! हे चित्र भयावह आहे. याचा वेळीच बंदोबस्त केला पाहीजे. आता तरी आपण जागृत झाले पाहीजे. (१ मिलीयम म्हणजे १० लाख)